2011-2015 ຂະແໜງແຜນການ ແລະ ການລົງທຶນຈະສູຊົນດຶງດູດການລົງທຶນໃຫ້ໄດ້ 1,7 ຕື້ໂດລາຕໍ່ປີ
|
| Time:21/05/2012 09:07 |
|
2011-2015 ຂະແໜງແຜນການ ແລະ ການລົງທຶນຈະສູຊົນດຶງດູດການລົງທຶນໃຫ້ໄດ້ 1,7 ຕື້ໂດລາຕໍ່ປີ
ເພື່ອໃຫ້ບັນລຸຕາມແຜນພັດທະນາເສດຖະກິດ 5 ປີຄັ້ງທີ VII 2011-2015 ຂອງພັກວາງອອກຖືກຈັດຕັ້ງປະຕິບັດໃຫ້ມີປະສິດທິຜົນ, ແນໃສ່ຮັບ ປະກັນໃຫ້ອັດຕາການເຕີບໂຕຂອງລວມຍອດຜະລິດຕະພັນພາຍໃນ GDP ເພີ່ມຂຶ້ນສະເລ່ຍບໍ່ຫລຸດ 8 %ຕໍ່ປີ, ໃນນີ້ຂະແໜງກະສິກໍາປ່າໄມ້ເພີ່ມຂຶ້ນປະມານ 3,5% ກວມປະມານ 23%, ອຸດສະຫະກຳເພີ່ມຂຶ້ນ 15% ກວມປະມານ 39% ແລະ ການບໍລິການເພີ່ມຂຶ້ນປະມານ 6,5% ກວມປະມານ 38%, ຢາກບັນລຸ ໄດ້ຕາມຕົວເລກດັ່ງກ່າວຕ້ອງພ້ອມກັນປະຕິບັດລະດົມທຶນທົ່ວສັງຄົມກວມ ປະມານ 32% ຫລື ປະມານ 127 ພັນຕື້ກີບ, ໃນນັ້ນການລົງທຶນພາກເອກະຊົນ ຕ້ອງໃຫ້ໄດ້ 50-56%ຊຶ່ງໂດຍສະເລ່ຍແມ່ນຕ້ອງດຶງດູດໃຫ້ໄດ້ 1,7 ຕື້ໂດລາສະຫະລັດຕໍ່ປີ, ຕາມແຜນການ 5 ປີຄັ້ງນີ້ແມ່ນໄດ້ເນັ້ນການດຶງດູດແຫລ່ງທຶນຈາກ ພາກເອກະຊົນໃຫ້ສູງຂຶ້ນ, ເພີ່ມທະວີຄວາມເປັນເຈົ້າການໃນການດຶງດູດການລົງທຶນໃຫ້ຫລາຍ ຂຶ້ນບົນພື້ນຖານຄວາມເປັນເອກະພາບ ແລະ ຄວາມເປັນເຈົ້າ ການຂອງຂະແໜງການທັງຂັ້ນສູນກາງ ແລະ ທອ້ງຖິ່ນໃນການຊ່ວຍກັນລະດົມທຶນທັງພາຍໃນ ແລະ ຕ່າງປະເທດໂດຍແບ່ງຄວາມຮັບຜິດຊອບໃຫ້ຂະແໜງການ ແລະ ທ້ອງຖິ່ນຫລາຍຂຶ້ນຊຶ່ງຂະແໜງແຜນການ ແລະ ການລົງທຶນຍັງສືບຕໍ່ເປັນເຈົ້າການສະຫລຸບ, ຕິດຕາມ ແລະ ສືບຕໍ່ວາງທິດທາງໃນຂັ້ນຕໍ່ໄປ
ໄປພ້ອມໆກັນນັ້ນຕ້ອງເພີ່ມທະວີການປັບປຸງສະພາບແວດລ້ອມ ໃນການລົງທຶນພາຍໃນປະເທດໃຫ້ດີຂຶ້ນ, ຮີບຮ້ອນກຳນົດຍຸດທະສາດໃນການດຶງດູດການລົງ ທຶນໃສ່ແຕ່ລະຂະແໜງການໃຫ້ມີຄວາມຊັດເຈນໃນແຕ່ລະໄລຍະ, ຕ້ອງປະຊຸມເຜີຍແຜ່ ແລະ ແລກປ່ຽນບົດຮຽນກ່ຽວກັບການລົງທຶນທົ່ວປະເທດໃຫ້ເປັນປົກກະຕິ ເພື່ອສະທ້ອນໃຫ້ເຫັນສະພາບ ແລະ ການປະຕິບັດຕົວຈິງເພື່ອມີມາດຕະການແກ້ໄຂຊ່ວຍຜູ້ລົງທຶນ ແລະ ພາກລັດ, ເພີ່ມທະວີການປະສານສົມທົບ ແລະ ກະຕຸກຊຸກຍູ້ໃຫ້ແຕ່ລະພາກສ່ວນ ປັບປຸງຂອດທີ່ຢູ່ໃນຄວາມຮັບຜິດຊອບຂອງຕົນ ໂດຍສະເພາະແມ່ນການບຸກທະລຸໃນດ້ານການແກ້ໄຂລະບອບລະບຽບ ການບໍລິຫານຄຸ້ມຄອງລັດ ເຮົາທີ່ຍັງກົດໜ່ວງອຸດຕັນການຜະລິດທຸລະກິດ ແລະ ການບໍລິການໃຫ້ຕົກໄປຢ່າງຂາດຕົວ, ແນໃສ່ສ້າງສະພາບແວດລ້ອມ ທີ່ເອື້ອອຳນວຍໃຫ້ບັນດາພາກສ່ວນເສດຖະກິດ ສາມາດເຄື່ອນໄຫວຕາມກົນໄກຕະ ຫລາດຢ່າງຄ່ອງຕົວໂດຍການເອົາໃຈໃສ່ປັບປຸງກົນໄກບໍລິການ ການລົງທຶນປະຕູດຽວໃຫ້ມີປະສິດທິຜົນຍິ່ງຂຶ້ນ./
|
|
ຂ່າວຈາກ:
www.kplnet.net
|
ອົງການຈັດຕັ້ງ
ເບີແຈ້ງສຸກເສີນ