ພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມ ສະຫງົບ (ປກສ) ຄົບຮອບ 50 ປີ (5/4/1961-5/4/2011) ໄດ້ຈັດຂຶ້ນຕອນເຊົ້າວັນທີ 5 ເມສາ 2011 ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ບັນດາທ່ານກົມການເມືອງສູນກາງພັກ ຄະນະເລຂາທິການ ກຳມະການສູນກາງພັກ ລັດຖະມົນຕີວ່າການ ຊ່ວຍວ່າການ ທ່ານພົນເອກ ເລຮົ່ງ ແອັງ ກຳມະການກົມການເມືອງສູນກາງພັກກອມມູນິດຫວຽດນາມ ລັດຖະມົນຕີກະຊວງຕຳຫຼວດ ແຫ່ງ ສ.ສ ຫວຽດນາມ ພ້ອມຄະນະບັນດາເອກອັກຄະລັດຖະທູດປະເທດເພື່ອນມິດ ປະຈຳ ສປປ ລາວ ຄະນະພັກ ຄະນະກະຊວງ ປກສ ພະນັກງານອາວຸໂສ ບຳນານ ສະມາຊິກພັກ ຄະນະພັກ ຄະນະນຳນະຄອນຫຼວງ ບັນດານາຍ ແລະ ພົນຕຳຫຼວດ.
ໃນພິທີທ່ານ ດຣ.ທອງບັນ ແສງອາພອນ ເລຂາທິການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບ ໄດ້ຂຶ້ນກ່າວປາໃສ ເຊິ່ງທ່ານໄດ້ກ່າວວ່າ: ວັນທີ 5 ເມສາ ເປັນວັນທີ່ມີຄວາມໝາຍສຳຄັນທີ່ສຸດສຳລັບສະມາຊິກພັກ ພະນັກງານນັກຮົບໃນກຳລັງປະກອບອາວຸດ ໂດຍສະເພາະກຳລັງປ້ອງກັນຄວາມສະຫງົບ ແລະ ປະຊາຊົນບັນດາເຜົ່າໃນທົ່ວປະເທດ ເພາະວ່າກຳລັງປ້ອງກັນຄວາມສະຫງົບເປັນກຳລັງທີ່ໄວ້ເນື້ອເຊື່ອໃຈ ຂອງພັກ ເປັນກຳລັງທີ່ຮັບປະກັນຄວາມໝັ້ນຄົງພາຍໃນ ຂອງຊາດ ສະກັດກັ້ນ ຕ້ານທຸກເລ່ລ່ຽມກົນອຸບາຍຫວັງທຳລາຍມ້າງເພແບ່ງແຍກ ສ້າງຄວາມປັ່ນປ່ວນກໍ່ຄວາມບໍ່ສະຫງົບ ຕ້ານການກໍ່ອາດຊະຍາກຳ ແລະ ຮັກສາຄວາມເປັນລະບຽບຮຽບຮ້ອຍຂອງສັງຄົມ ນັບແຕ່ມື້ສ້າງຕັ້ງຂຶ້ນມາ ໄດ້ປະກອບສ່ວນອັນໃຫຍ່ຫຼວງໃນພາລະກິດປົດປ່ອຍຊາດ ປົກປັກຮັກສາປະເທດຊາດ ເປັນກຳລັງປະຈັນບານປະເຊີນໜ້າໂດຍກົງກັບອິດທິກຳລັງປໍລະປັກ ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງໃກ້ຊິດຕິດແທດ ກັບປະຊາຊົນ ປ້ອງກັນຜູ້ນຳພັກ-ລັດຢ່າງເດັດດ່ຽວ.
ຕະຫຼອດໄລຍະ 50 ປີຜ່ານມາ ກຳລັງປ້ອງກັນຄວາມສະຫງົບ ໄດ້ເຕີບໃຫຍ່ຂະຫຍາຍຕົວ ແລະ ມີຜົນງານອັນພົ່ນເດັ່ນຫຼາຍດ້ານ ແລະ ຕໍ່ຜົນງານດັ່ງກ່າວຈຶ່ງໄດ້ຮັບການຍ້ອງຍໍສັນລະເສີນຢ່າງສົມກຽດ ຈາກພັກ-ລັດຖະບານ ແລະ ປະຊາຊົນລາວບັນດາເຜົ່າ ສົມກັບເປັນກຳລັງປ້ອງກັນຄວາມສະຫງົບມາຈາກປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ ແລະ ຜົນງານທີ່ກຳລັງປ້ອງກັນຄວາມສະຫງົບຍາດມາໄດ້ ທັງເຮັດໃຫ້ກຳລັງເຕີບໃຫຍ່ເຂັ້ມແຂງຂຶ້ນເປັນກ້າວໆມາ ນັ້ນແມ່ນຍ້ອນມີການຊີ້ນຳ-ນຳພາເດັດຂາດໂດຍກົງຮອບດ້ານຂອງພັກ ອັນມີກົມການເມືອງສູນກາງພັກ ຄະນະພັກແຕ່ລະຂັ້ນທີ່ໄດ້ເອົາໃຈໃສ່ຢ່າງຈົດຈໍ ສຶກສາອົບຮົມບົ່ມສອນພະນັກງານ-ນັກຮົບຂອງພວກເຮົາ ຍ້ອນຄວາມເອົາໃຈໃສ່ກໍ່ສ້າງຖະໜອມຫອມຮັກຂອງປະຊາຊົນລາວ ບັນດາເຜົ່າ.
ຈາກນັ້ນເວລາຕໍ່ມາ ກໍໄດ້ມີພິທີປະດັບຫຼຽນຄຳແຫ່ງຊາດ ເຊິ່ງເປັນຫຼຽນສູງສຸດຂອງ ສປປ ລາວ ໃຫ້ແກ່ກຳລັງ ປກສ ໃຫ້ກຽດປະດັບໂດຍທ່ານ ຈູມມາລີ ໄຊຍະສອນ ແລະ ທ່ານພົນເອກ ເລຮົ່ງ ແອັງ ຕາງໜ້າໃຫ້ພັກ-ລັດຖະບານຫວຽດນາມ ກໍຍັງໄດ້ປະດັບຫຼຽນໄຊດາວຄຳ ເຊິ່ງເປັນຫຼຽນສູງສຸດຂອງ ສ.ສ ຫວຽດນາມ ໃຫ້ແກ່ກຳລັງ ປກສ ຕື່ມອີກ.
ຕອນທ້າຍພິທີ ທ່ານ ຈູມມາລີ ໄຊຍະສອນ ຍັງໄດ້ໃຫ້ກຽດຂຶ້ນກ່າວສູນທອນພົດ ເຊິ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ຜົນງານອັນໃຫຍ່ຫຼວງ ທີ່ກຳລັງ ປກສ ຍາດມາໄດ້ຕະຫຼອດໄລຍະ 50 ປີຜ່ານມາ ພ້ອມນີ້ທ່ານຍັງໄດ້ເນັ້ນບາງບັນຫາສຳຄັນຈຳນວນໜຶ່ງ ເພື່ອເປັນເຂັມທິດເຍືອງທາງໃຫ້ຄະນະພັກ ຄະນະບັນຊາກຳລັງ ປກສ ເພື່ອຈະໄດ້ນຳໄປຈັດຕັ້ງປະຕິບັດໃນຊຸມປີຕໍ່ໜ້າ ເຮັດໃຫ້ກຳລັງ ປກສ ຂອງພວກເຮົາ ນັບມື້ເຕີບໃຫຍ່ ທັງທາງດ້ານປະລິມານ ແລະ ຄຸນນະພາບ ກາຍເປັນກຳລັງປະກອບອາວຸດປະຕິວັດທີ່ມີຫຼາຍກົມກອງ ຫຼາຍເຫຼົ່າຮົບວິຊາສະເພາະທີ່ເຂັ້ມແຂງ ເຮັດຫຼ້ອນໜ້າທີ່ອັນມີກຽດສະຫງ່າຂອງຕົນ ໃນການປ້ອງກັນຄວາມສະຫງົບປອດໄພຢ່າງເຕັມສ່ວນ ແລະ ເພື່ອຄວາມສົມບູນພູນສຸກຂອງປະຊາຊົນລາວບັນດາເຜົ່າ.
ອົງການຈັດຕັ້ງ
ເບີແຈ້ງສຸກເສີນ